Մայիսի 16-ին՝ ժամը 18-24-ը, Բերդ քաղաքի պատմության եւ կենցաղի թանգարանում անցկացվել է «Թանգարանային գիշեր» միջոցառում, եղել են բազմաթիվ այցելուներ: Ներկայացվել են նաեւ Բերդ քաղաքից Միշա Հովհաննիսյանի գծանկարները, հայոց ցեղասպանությանը նվիրված Բերդի նկարչական դպրոցի սաների աշխատանքները, Հայրենական մեծ պատերազմում զոհված ավելի քան 300 բերդցիների լուսանկարները: Ընդհանրապես, այդ թանգարանի դռները մշտապես բաց են այցելուների համար, մուտքի վճար չկա:
Թանգարան են այցելել նաեւ տարածաշրջանի սահմանապահ զորամասի զինծառայողները, ովքեր ծանոթացել են տարածաշրջանի հինավուրց պատմության եւ կենցաղի նմուշներին: Բերդի գեղատեսիլ Սորանի բարձունքում հառնող թանգարանի տնօրեն Արթուր Երկանյանը հայտնեց,որ թանգարանի աշխատակիցներն արդեն մի շաբաթ թանգարանի շրջակայքում ծառատունկ են կատարում: Տեսնելով այդ՝ սահմանապահ զինվորները եւս տարածքում ծառեր են տնկել:
Լուսանկարները Սերյոժա Քոսակյանի կողմից
